საქართველოს მორაგბეთა ეროვნული ნაკრები დღეს, თბილისის დროით 17:00 საათზე, თურქეთის ქალაქ ტრაბზონში, რუსეთის ნაკრებთან "ერთა თასისა" და 2011 წლის მსოფლიო თასის შესარჩევი ციკლის ბოლო მატჩს გამართავს.

თუკი "ბორჯღალოსნები" ამ შეხვედრას არ წააგებენ, მაშინ ორი წლის წინ მოპოვებულ და გასულ წელს შენარჩუნებულ “ერთა თასს”, მინიმუმ ერთი წლით ისევ თბილისში დაიტოვებენ.
ყოველ შემთხვევაში, ევროპული რაგბის მმართველმა ორგანიზაციამ (FIRA), საკუთარ ოფიციალურ საიტზე სწორედ ასეთი ინფორმაცია დადო, რომ თურქეთის ქალაქ ტრაბზონში ფინალური შეხვედრა გაიმართება და 2009-2010 წლების “ერთა თასის” გამარჯვებულიც იქ გამოვლინდება.
ისე, დიდი დაულაგებელი რამაა FIRA და მისგან მოულოდნელი ცვლილებები გასაკვირი სულაც არაა. შარშან, “ერთა თასის” გათამაშების დაწყებამდე გადაწყვიტა, რომ გამარჯვებული ორწლიანი ციკლის დასრულების შემდეგ გამოვლინდებოდა, ტურნირის პირველი წრის დასრულებიდან რამდენიმე დღის თავზე კი დებულება შეცვალა და გვამცნო - ორი წლის წინ მოპოვებული ჯილდო კვლავ ქართველებმა დაისაკუთრესო. მერე საკუთარსავე დებულებაში ჩაწერა, თასი ისევ ერთწლიანი სისტემით გათამაშდებაო და “ბორჯღალოსანთა” ბუქარესტში ფეხის დაცდომის გამო, თითქოს, ამ თასის მოპოვების ყველაზე კარგი შანსი რუმინეთის ნაკრებს ჰქონდა, მაგრამ ახლა FIRA-ს საიტზე განთავსებული ახალი დებულება გვამცნობს, რომ თასი ორწლიანი ციკლით თამაშდება, მაგრამ ის ჯერ პირველი წრის მოგებულს მაშინათვე გადაეცემა, მერე კი ორი წლის ციკლის დასრულების შემდეგ ის იმ გუნდის მფლობელობაში გადავა, ვისაც ახლა უკვე ორი წლის ჯამში საუკეთესო მაჩვენებელი ექნება.
ამრიგად, ჩახლართული რეგლამენტის ანალიზის შედეგად გამოდის, რომ “ერთა თასის” მოგების შანსი მხოლოდ “ბორჯღალოსნებს” და “დათვებს” აქვთ, მის ფინალს კი ტრაბზონის Akcaabat Fatih-ი უმასპინძლებს. ცხრილს თუ გადავხედავთ ნათელია, რომ რუმინეთს და პორტუგალიას, რომლებიც თურქული მატჩის პარალელურად ერთურთს ლისაბონში ეთამაშებიან, საქართველოსა და რუსეთის ნაკრებთან ქულებით გათანაბრების შანსი არ აქვთ. საქართველოს ნაკრებს ჯგუფში პირველი ადგილის და თასის დასასაკუთრებულად ფრეც ყოფნის, რადგანაც პირველ წრეში რუსებთან მარიუპოლში იმარჯვა და ისევ დებულებას თუ დავუბრუნდებით, იქ წერია, რომ თანაბარი ქულების პირობებში, უპირველესი მნიშვნელობა გუნდების ურთიერთშეხვედრებს ენიჭება.
ურთიერთშეხვედრები ვახსენეთ და ბარემ ვთქვათ, რომ საქართველოს ნაკრებმა რუსეთთან სულ 13 შეხვედრა გამართა, აქედან მხოლოდ ერთხელ, შორეულ 1993 წელს დამარცხდა, ერთი თამაში ფრედ დაასრულა, დანარჩენ 11-ში გამარჯვება მოიპოვა. საგულისხმოა, რომ ზემოთნახსენები 11 თამაშიდან “ბორჯღალოსნებმა” ზედიზედ 8 მოიგეს. 13 შეხვედრიდან ოთხში გუნდებს ლელოები არ გაუტანიათ, სამჯერ თანაბარი რაოდენობის (ორჯერ თითო-თითო და ერთხელ სამ-სამი) ლელოები გაიტანეს, დანარჩენ შემთხვევაში კი ქართველებმა მეტოქე დაჯაბნეს. სულ ლელოთა თანაფარდობა 29:11, მხოლოდ ბოლო ხუთი თამაშის შედეგებს თუ გადავხედავთ, ქართველთა უპირატესობა 21:5-ზეა.
რაც შეეხება უშუალოდ მომავალი შეხვედრისთვის მზადებას, საქართველოს ნაკრებმა თურქული ამინდებით ისარგებლა, ბოლო დროს იქ წვიმამაც გადაიღო და სარუსეთოდ ნორმალურ პირობებში მოემზადა. ბიძინა სამხარაძის ტრავმა სერიოზული აღმოჩნდა და ის განაცხადში საერთოდ ვერ მოხვდა, მალაღურაძემ კი მტკივანი ფეხი მოირჩინა და სათადარიგოთა შორისაა.
საქართველოს ნაკრების მენეჯერმა ვასილ აბაშიძემ, “მსოფლიო სპორტთან” საუბარში განაცხადა, რომ ამ შეხვედრას FIRA-ს პრეზიდენტი ჟაკეც დაესწრება და მან “ერთა თასი” ტრაბზონში ჩააბრძანა, თუმცა იქვე დაამატა, რომ თუ რუმინეთმა ლისაბონში გამარჯვება მოიპოვა, მაშინ “ბორჯღალოსნებს” სამშობლოში დაბრუნება უთასოდ მოუწევთ. მოკლედ, არეულმა ევროპის რაგბის საბჭომ თავგზა გუნდებსაც აურია და ყველაფერი საბოლოოდ მხოლოდ მას შემდეგ გახდება ცნობილი, როდესაც უშუალოდ თამაში დასრულდება.
საქართველოსა და რუსეთის ნაკრებთა შეხვედრას ფრანგი მსაჯები მოემსახურებიან. რეფერი გარსესი იქნება, რომელსაც ასისტენტობას პეჩამბერტი და ლამირანდო გაუწევენ. ტრაბზონიდან მატჩის პირდაპირ რეპორტაჟს საქართველოს პირველი არხი გეგმავს.

2009-2010 წლების “ერთა თასისა” და 2011 წლის მსოფლიო თასის შესარჩევი ეტაპის შეხვედრა
20 მარტი. თურქეთი. ტრაბზონი.Akcaabat Fatih (17:00 საათი. თბილისის დრო)
საქართველო - რუსეთი
საქართველოს ნაკრები: 15. მალხაზ ურჯუკაშვილი, 14. ირაკლი მაჩხანელი, 13. დავით კაჭარავა, 12. თედო ზიბზიბაძე, 11. ალექსანდრე თოდუა, 10. მერაბ კვირიკაშვილი, 9 ირაკლი აბუსერიძე; 1. დავით ხინჩაგიშვილი, 2. იური ნატრიაშვილი, 3. დავით ზირაქაშვილი, 4. ილია ზედგინიძე, 5. ლევან დათუნაშვილი, 6. გრიგოლ ლაბაძე, 7. გიორგი ჩხაიძე, 8. ბესარიონ უდესიანი.
სათადარიგოები: 16. გოდერძი შველიძე, 17. ანტონ ფეიქრიშვილი, 18. გიორგი ნემსაძე, 19. ლაშა თავართქილაძე, 20. ლაშა მალაღურაძე, 21. ირაკლი გიორგაძე, 22. ირაკლი ჩხიკვაძე.
მთავარი მწვრთნელი: ტიმ ლეინი
 

რუსეთის ნაკრების გაფართოებული შემადგენლობა: ვლადიმირ ოსტროუშკო, მიხაილ ბაბაევი, ევგენი პრონენკო, ალექსეი კორობეინიკოვი, ნიკიტა მედკოვი, ვიქტორ გრესევი, ვლადისლავ კორშუნოვი, ალექსანდრ ვოიტოვი, იგორ კლუჩნიკოვი, იური კუშნარიოვი, კირილ კუშნარიოვი, ანდრეი კუზინი, ევგენი მატვეევი, ანდრეი ტემნოვი, ალექსანდრ იანუშკინი, ალექსანდრ შაკიროვი, ალექსეი ტრავკინი, ვლადიმირ ბოტვინიკოვი, ალექსეი პანასენკო, არტიომ ფათახოვი, ალექსანდრ ხროკინი, სერგეი ტრიშინი, ვასილი არტიომოვი, ალექსეი მაკოვეცკი.
მთავარი მწვრთნელი: ნიკოლაი ნერუში

20 მარტი
გერმანია. ჰაიდელბერგი
გერმანია - ესპანეთი
თურქეთი. ტრაბზონი
საქართველო - რუსეთი
პორტუგალია. ლისაბონი
პორტუგალია – რუმინეთი
27 მარტი
რუმინეთი. ბუქარესტი
რუმინეთი - ესპანეთი

შენიშვნა: გამარჯვებაზე იწერება 3 ქულა, ფრეზე 2, წაგებაზე 1

 

საქართველოსა და რუსეთის მორაგბეთა ნაკრებების ყველა შეხვედრა
1993 წელი. სოპოტი (პოლონეთი)
საქართველო - რუსეთი 9:15
1996 წელი. თბილისი
საქართველო - რუსეთი 29:20
1998 წელი. თბილისი
საქართველო - რუსეთი 12:6
2001 წელი. კრასნოდარი
რუსეთი - საქართველო 23:25
2002 წელი. თბილისი
საქართველო - რუსეთი 12:12
2002 წელი. თბილისი
საქართველო - რუსეთი 17:13
2003 წელი. კრასნოდარი
რუსეთი - საქართველო 17:23
2004 წელი. თბილისი
საქართველო - რუსეთი 9:3
2004 წელი. კრასნოდარი
რუსეთი - საქართველო 15:27
2006 წელი. თბილისი
საქართველო - რუსეთი 46:19
2007 წელი. თბილისი
საქართველო - რუსეთი 31:12
2008 წელი. კრასნოიარსკი
რუსეთი - საქართველო 12:18
2009 წელი. მარიუპოლი (უკრაინა)
რუსეთი - საქართველო 21:29

ზურა ქსოვრელი