საქართველოს მორაგბეთა ეროვნულმა ნაკრებმა ახალ ზელანდიაში მიმდინარე წლის სექტემბერ-ოქტომბერში გასამართი მსოფლიო თასისთვის მზადება ოთხ ივლისს დაიწყო. გუნდი სასტუმრო “ქორთიარდ მერიოტში” დაბინავდა და “შევარდენის” ბაზაზე ვარჯიშები დღეში სამჯერ იმართება. პირველ ეტაპზე, მორაგბეები ფიზკური კონდიციების გაუმჯობესებაზე ზრუნავენ და ავსტრალიელი ფიზმომზადების სპეციალისტის, გარეთ ადამსონის მეთვალყურეობის ქვეშ ემზადებიან.
ადამსონი თბილისში, დაახლოებით ორი კვირის წინ, საკუთარი პროგრამით ჩამოვიდა. პარასკევს, 8 ივლისს, როდესაც “ბორჯღალოსნებმა” ღია ვარჯიში გამართეს, წინა დღეებთან შედარებით, მორაგბეებს ყველაზე დიდი დატვირთვა ჰქონდათ. მზადებამ საათზე მეტხანს გასტანა და სპორტსმენებს ვარჯიშიდან ვარჯიშზე გადასასვლელად, წყლის დასალევად, წუთზე ნაკლები დრო ჰქონდათ. მოკლედ, ავსტრალიელმა ბიჭებს ქანცი გააძრო და პირობა დადო, რომ ვარჯიშები კიდევ უფრო გართულდება.
საქართველოს ნაკრები ინტენსიურ წვრთნას კვირაში 6 დღე ატარებს, კვირა დღე კი, განტვირთვისთვისაა გამოყოფილი. გუნდი თბილისში 18 ივლისამდე დარჩება, რის შემდეგაც შეკრებაზე საფრანგეთში გაემგზავრება. თავიდან იქაც ფიზმომზადებაზე იქნება აქცენტი გაკეთებული, მერე ნელ-ნელა დატვირთვები დაიკლებს და მორაგბეები უმეტეს დროს ტექნიკური და ტაქტიკური ელემენტების დამუშავებას დაუთმობენ.
“მსოფლიო სპორტი” ადამსონს პარასკევის ვარჯიშის დასრულების შემდეგ გაესაუბრა და უწინარესად, მზადებისთვის შექმნილ პირობებსა და მორაგბეთა მდგომარეობაზე დაეკითხა.
გარეთ ადამსონი: ინფრასტრუქტურა ძალიან კარგია და მოხარული ვარ, ასეთი პირობები რომ დამხვდა - მოედნები, სატრენაჟორო დარბაზი, მალე საცხოვრებელი კორპუსიც დასრულდება... მოკლედ, სათანადოდ მოსამზადებლად ყველაფერი გაქვთ. რაც შეეხება გუნდს, გვყავს გამოცდილი მორაგბეები და შედარებით ახალგაზრდები. მათ ფიზიკურ კონდიციებში გარკვეული სხვაობაა და ჩვენ ვცდილობთ, რომ გამოცდილება, დომინირება და ფიზიკური სიძლიერე სინთეზში მოვიყვანოთ. ვეტერანებს შედარებით ნაკლები დატვირთვით უწევთ ვარჯიში, ახალგაზრდებს უფრო მეტი მოეთხოვებათ.
- შეკრებაზე 9 ისეთი მორაგბეა, რომლებიც ქართულ კლუბებში გამოდიან, დანარჩენები კი ლეგიონერები არიან. მათ შორის თუ შეიმჩნევა ფიზიკური სხვაობა?
- არა, დიდი სხვაობა არ არის. მთავარია, შიდა პირველობიდან საქართველოს ნაკრებში მოხვედრილი სპორტსმენი რამდენად ფოკუსირებულია მიზანზე. მათ უნდა მოისმინონ და შედეგად, უნდა გაუმჯობესდეს ფიზიკური კონდიციები იმ დონემდე, რომ მიუახლოვდნენ მაღალი ეშელონების გუნდების მოთამაშეთა მზადყოფნას.
- დღეს ბიჭებს საკმაოდ ინტენსიური წვრთნა ჰქონდათ, თანაც ასეთ სიცხეში. დღეში სამჯერ თუ ასე ავარჯიშებთ, ხომ არ არსებობს მათი “გადაწვის” საშიშროება?
- ვიცით, რომ ძალიან ცხელა და ვცდილობთ, რომ ამ ხვატს ავერიდოთ. ჩვენ ეტაპობრივად ვვითარდებით, ნელ-ნელა, დღითიდღე ვართულებთ ვარჯიშებს. ორშაბათიდან მოყოლებული, ძალიან კარგი კვირა გვქონდა და დღეს, პარასკევს, წინა დღეებთან შედარებით, ყველაზე მძიმე ვარჯიში ჩავატარეთ. კარგად მივდივართ და დატვირთვები კიდევ უფრო გაიზრდება. თუ ყოველდღიურად არ მოვუმატეთ, მაშინ ვერ განვვითარდებით და ერთ დონეზე დავრჩებით.
- შეგვიძლია დარწმუნებული ვიყოთ, რომ მორაგბეები მსოფლიო თასს ფორმის პიკზე შეხვდებიან?
- დარწმუნებული ვარ, ეჭვიც კი არ მეპარება ამაში.

ზურა ქსოვრელი