რაგბი

15:43 | 8.02.2015 | ნანახია [] - ჯერ

საქართველო-პორტუგალიის ბილეთები ორშაბათიდან გაიყიდება

გუშინ “ბორჯღალოსნებმა” რაგბი ევროპის ჩემპიონატის წლევანდელი კამპანია დამაჯერებელი გამარჯვებით დაიწყეს. პირველ შეხვედრაში ჩვენი გუნდი გერმანიის ეროვნულ ნაკრებ გუნდს გასვლაზე შეხვდა და მასპინძლები 64:8 (10 ლელო, 7 გარდასახვა) დაამარცხა.

14 თებერვლას, ჩვენი გუნდი წლევანდელ საშინაო სარაგბო სეზონს პორტუგალიის ეროვნული ნაკრების წინააღმდეგ რკენით გახსნის. შეხვედრა მიხეილ მესხის სტადიონზე 17:00 საათზე დაიწყება.

პირველ რაუნდში, პორტუგალიელებმა შარშანდელი გათამაშების ფინალისტი, რუმინელი “მუხები” მიიღეს და ძლიერ მეტოქესთან მატჩი 10:37 დათმეს.

საქართველო-პორტუგალიის მატჩის ბილეთების გაყიდვა ხვალ, 9 თებერვალს (ორშაბათი) დაიწყება. ბილეთები მიხეილ მესხის სტადიონის სალაროებში, ყოველდღე 11:00-19:00 საათამდე გაიყიდება – ფასი 3 და 5 ლარი. ყველა ბილეთი დანომრილია.

“ბორჯღალოსნები” 2015 წლის პირველ ღია ვარჯიშს 10 თებრვალს (სამშაბათი) გამართავენ. ღია ვარჯიში ტრადიციულად შევარდენის სანაკრებო ბაზაზე, 16:00 საათზე დაიწყება.

შეგახსენებთ, რომ ღია ვარჯიშზე ქომაგებისა და მედია საშუალებების წარმოადგენლებისთვის დასწრება თავისუფალია. ფოტო-ვიდეო გადაღება ნებადართული იქნება ვარჯიშის დაწყებიდან პირველი 10 წუთის განმავლობაში.

ქართული სარაგბო ოჯახის სახელით, ყველას მოგიწოდებთ დროულად ვიზრუნოთ მატჩის ბილეთების შეძენაზე, დაწყებამდე ერთი საათით ადრე მივიდეთ სტადიონზე, რათა ყველამ ერთად, სავსე ტრიბუნებიდან ტრადიციული ომახიანი ქომაგობით გავხსნათ წლევანდელი სანაკრებო სეზონი!

რაგბი ჩვენი თამაშია!

0.169415