სიახლეები

20:00 | 24.07.2020 | ნანახია 978 - ჯერ

მსოფლიო რაგბის რეკომენდაცია საერთაშორისო კალენდარზე

მსოფლიო რაგბის აღმასრულებელმა კომიტეტმა, 2020 წლის საერთაშორისო კალენდართან დაკავშირებით რეკომენდაცია გასცა. საუბარია შემოდგომის საერთაშორისო ფანჯრის გაზრდასა და მე-9 დებულების დროებით შეცვლაზე.

ეს დროებითი ცვლილებების რეკომენდაცია განიხილება „მსოფლიო რაგბის“ ვირტუალურ სხდომაზე, რომელიც 30 ივლისს გაიმართება და მისი დამტკიცების შემთხვევაში, შესაბამისი საერთაშორისო ტურნირების ორგანიზატორები, განახლებულ კალენდარს უახლოეს მომავალში გამოაქვეყნებენ. მე-9 დებულებით გათვალისწინებული საერთაშორისო ფანჯრების სტანდარტული თარიღები ამა წლის 13 დეკემბრიდან აღდგება.

რეკომენდაციის გაცემამდე „მსოფლიო რაგბის“ აღმასრულებელი კომიტეტი ინტენსიურად თანამშრომლობდა საერთაშორისო ტურნირების ორგანიზატორებთან, რაგბის კავშირებთან, პროფესიული საკლუბო ტურნირების ორგანიზატორებთან და ელიტურ მორაგბეებთან.

რეკომენდაციაში წერია, რომ წელს საერთაშორისო ფანჯარა 24 ოქტომბრიდან 5 დეკემბრამდე განისაზღვრება. ჩრდილოეთ ნახევარსფეროში, ოქტომბრის ბოლოს გაიმართება კაცთა და ქალთა ექვსი ერის, ასევე სხვა ტურნირების (მათ შორის რაგბი ევროპის ჩემპიონატის) გადადებული თამაშები, ხოლო 7 ნოემბრიდან საერთაშორისო ტესტ-მატჩების პროგრამა დაიწყება, რომელშიც ექვსი ერის ქვეყნები და მიწვეული ნაკრებები ითამაშებენ.

შეგახსენებთ, რომ უცხოურ მედიაში აქტიურად იწერებოდა ერთჯერადი, ახალი ტურნირის ორგანიზების შესახებ, რომელშიც ექვსი ერის ნაკრებებთან ერთად, საქართველოს მონაწილეობაც განიხილება.

აღსანიშნავია, რომ სამხრეთ ნახევარსფეროში რაგბი ჩემპიონშიფის გამართვის პერიოდად 7 ნოემბერი – 12 დეკემბერი სახელდება, რაც იმას ნიშნავს, რომ ეს გუნდები ევროპაში ტურნეზე ვერ ჩამოვლენ.

rugby.ge


კომენტარები (0)

კომენტარის გამოქვეყნებისთვის, გთხოვთ გაიაროთ ავტორიზაცია ან რეგისტრაცია

FB ავტორიზაცია
0.066356