საქართველოს რაგბის კავშირი მზადაა რუსეთთან მატჩი „დინამო არენაზე“ არ ჩაატაროს. მოგეხსენებათ, ეს მატჩი 14 მარტს უნდა გაიმართოს, ხოლო 26 მარტს იმავე სტადიონზე საქართველო - ბელარუსის თამაში შედგება.

რაგბის კავშირის მარკეტინგის დირექტორმა მიხეილ ხარატმა ამ საკითხზე კომენტარი გააკეთა და განაცხადა, რომ თუ მინდვრის საფარს პრობლემა ექნება, „ბორჯღალოსნები“ სხვა არენაზე ითამაშებენ.

„ფეხბურთში საქართველო - ბელარუსის თამაში ძალიან მნიშვნელოვანია არამარტო ფეხბურთის ფედერაციისთვის, არამედ მთლიანად ერისთვის. ამიტომ, თუ საშიშროება იქნება, რომ ჩვენმა თამაშმა მინდვრის საფარს მიაყენოს ზიანი, მაშინ მივალთ კონსესუსამდე და ვითამაშებთ სხვა სტადიონზე, ალბათ „მიხეილ მესხზე“.

ვნახოთ, ამინდსაც ექნება მნიშვნელობა. ჩვენთვის მინდვრის საფარს არ აქვს ისეთი მნიშვნელობა, როგორც ფეხბურთში და ამიტომ, შეიძლება ალტერნატიული სტადიონი გამოვიყენოთ. ვიმეორებ, ჩვენ თანახმა ვართ გავიაროთ ეს თემა, რადგან ფეხბურთელებს ძალიან მნიშვნელოვანი თამაში აქვთ, მთავარია კარგად დამთავრდეს ეგ თამაში და „ავჭალაშიც“ ვითამაშებთ (იღიმის)“, - განაცხადა ხარატმა.