საქართველოს რაგბის კავშირის სამედიცინო სამსახურის უფროსი ბესიკ ჩადუნელი, ქართველი მსაჯების, კლუბების მწვრთნელების და შესაბამისი სამედიცინო პერსონალისთვის (შემდგომში „მატჩის ექიმი“) სემინარს გამართავს.
სემინარის თემა ლურჯი ბარათია, რომელიც უკვე დაინერგა რამდენიმე წამყვან სარაგბო ქვეყანაში და რომლის მიზანიც მოთამაშეთა კეთილდღეობასა და ჯანმრთელობაზე ზრუნვაა.
ლურჯი ბარათი პირველად 2014 წელს წელს ახალ ზელანდიაში, ოკლენდში გამოიყენეს, მერე კი მთელს ქვეყანაში გავრცელდა. მოგვიანებით ის ავსტრალიაში, სამხრეთ აფრიკასა და უელსში დაინერგა, საქართველო კი მეხუთე ქვეყანა იქნება, რომელიც ამ სიახლეს მხარს აუბამს.
ლურჯ ბარათს მსაჯი მოთამაშის მიმართ ტვინის შერყევის შემთხვევაში იყენებს და ის მოედანს მატჩის ბოლომდე ტოვებს, შეცვლის უფლებით, ოღონდ ეს შეცვლა გუნდს ოფიციალურ ცვლილებად არ ეთვლება.
ოთხშაბათს, 18 სექტემბერს, 11 საათზე, ბესიკ ჩადუნელი სემინარს ქართველ მსაჯებს, ავჭალის რაგბის სტადიონის საკონფერენციო დარბაზში წაუკითხავს.
ხუთშაბათს, 19 სექტემბერს, ასევე 11 საათზე, ბესიკ ჩადუნელი და ლუკა კილასონია სემინარს ქართული კლუბების მწვრთნელებსა და სამედიცინო პერსონალს, შევარდენის სანაკრებო ბაზაზე წაუკითხავენ.
რაც შეეხება „მატჩის ექიმების“ შერჩევა-გადამზადებას, მათთან სემინარის ჩატარების თარიღი მოგვიანებით გამოცხადდება. უახლოეს პერიოდში გახდება ცნობილი „ლურჯი ბარათის“ ძალაში შესვლის ზუსტი თარიღიც.
სემინარებზე დასწრების მსურველები უნდა დარეგისტრირდნენ მაღალი სპორტული მიღწევების მენეჯერთან, სიმონ მაისურაძესთან ელექტრონულ მისამართზე:
RUGBY.GE
კომენტარის გამოქვეყნებისთვის, გთხოვთ გაიაროთ ავტორიზაცია ან რეგისტრაცია