შოტლანდიის რაგბის კავშირმა საქართველოს ბოდიში მოუხადა „მარიფილდზე“ მომხდარის გამო, როდესაც საქართველოს ძველი ჰიმნი დაუკრეს.

„ეს ორი კავშირის ნამდვილად არასწორი კომუნიკაციის შედეგი იყო. ჩვენ დაუყოვნებლივ ბოდიში მოვუხადეთ უშუალოდ საქართველოს დელეგაციას. შესანიშნავი ურთიერთობა გვაქვს საქართველოს რაგბის კავშირთან და მადლიერებას გამოვხატავთ, რომ შეცდომას გაგებით მოეკიდნენ“, - აღნიშნულია განცხადებაში.

შეგახსენებთ, საქართველოს მორაგბეთა ნაკრებმა მსოფლიო თასის წინ ბოლო ტესტმატჩი 6 სექტემბერს, ედინბურგში, „მარიფილდზე“ შოტლანდიასთან ჩაატარა და 9:36 დამარცხდა.