პრო 14-ის 2018/2019 წლების სეზონის ფინალი “სელტიკ პარკზე” გაიმართება. აღნიშნული ინფორმაცია გათამაშების ოფიციალურმა ვებგვერდმა დაადასტურა.
“სელტიკ პარკი” საფეხბურთო კლუბ “სელტიკის” სტადიონია, რომელიც 1892 წელს აშენდა და 60411 მაყურებელს იტევს. ამრიგად, ეს პირველი შემთხვევაა, როდესაც პრო 14-ის ფინალი არატრადიციულ სარაგბო არენაზე ჩატარდება. სეზონის გადამწყვეტი შეხვედრა 25 მაისს შედგება.
2016 წლიდან მოყოლებული პრო 14-ის ფინალური შეხვედრა დიდ სტადიონზე იმართება და სამივე განვლილ ფინალში დასწრება უმჯობესდებოდა. 2016 წელს “მარიფილზე” გამართულ მატჩს 34500 ადამიანი დაესწრო, განვლილი ორი ფინალი კი დუბლინში, “ავივა სთედიუმზე” ჩატარდა: 2017 წელს 45556 ადამიანმა მოიყარა თავი, ხოლო 2018 წელს 46092 გულშემატკივარი დაესწრო, რაც ამ ტურნირის ფინალების რეკორდია.
კომენტარის გამოქვეყნებისთვის, გთხოვთ გაიაროთ ავტორიზაცია ან რეგისტრაცია