ბორჯღალოსნები ვასილ ლობჟანიძე და სოსო ბეკოშვილი „ბრივში“ რჩებიან და გუნდთან ერთად ტოპ 14-ში დასაბრუნებლად იბრძოლებენ.

ტოპ 14-ის მიმდინარე სეზონის დასრულებამდე ერთი ტურით ადრე ცნობილი გახდა, რომ „ბრივი“ ელიტა 1-ს დატოვებს და მომავალ სეზონში პრო დ2-ში ითამაშებს. რა თქმა უნდა, ასეთ სიტუაციაში გუნდის მმართველობასა და შემადგენლობაში გარკვეული ცვლილებები მოსალოდნელი იყო.

უკვე ცნობილია, რომ მომავალ სეზონში „ბრივში“ რჩებიან ბურჯი სოსო ბეკოშვილი და 9 ნომერი ვასილ ლობჟანიძე. 24 წლის ბეკოშვილი გუნდში 2 წელია თამაშობს და პირველ სეზონში ტოპ 14-ის 11, ხოლო მეორეში - 5 მატჩში მიიღო მონაწილეობა. გარდა ამისა, ბეკოშვილმა ორი წლის ჯამში ჩელენჯ კაპზე 11-ჯერ ითამაშა და 2 ლელოც გაიტანა. 2017 წელს ბეკოშვილმა საქართველოს ნაკრების 11-ვე მატჩში მიიღო მონაწილეობა.

2 წელია „ბრივშია“ ვასილ ლობჟანიძეც, რომელმაც პირველი გუნდის მაისურით ტოპ 14-ში ჯამში 11 მატჩი ჩაატარა და 1 ლელოც გაიტანა. 11-ჯერ ითამაშა ჩელენჯ კაპზეც, ხოლო საქართველოს ნაკრებში დებიუტი 2015 წელს ჰქონდა და დღემდე 32 კეპი მოიხვეჭა (გაიტანა 5 ლელო). აღსანიშნავია, რომ ის მსოფლიო თასების ისტორიაში ტურნირის ყველაზე ახალგაზრდა მონაწილეა.

ჯერჯერობით არაფერი ისმის კარლენ ასიეშვილზე. „ბრივის“ დაქვეითების გამო, მას ტოპ 14-ის გუნდის მოძებნა შეუძლია და სავარაუდი, ახალ სეზონს კვლავ უძლიერესთა შორის დაიწყებს.