სამხრეთ ამერიკის კონტინენტური სარაგბო ჩემპიონატი ახლებურად გაიმართება. "სამხრეთ ამერიკის 6 ერი A" - ასე ეწოდებოდა ამ ტურნირს, მაგრამ შეჯიბრებამ რებრენდინგი განიცადა და 5 მაისს განახლებული ტურნირი დაიწყება, რომელსაც მარტივად ეწოდა "სამხრეთამერიკული ჩემპიონატი". კონტინენტურ ელიტაში მყოფ პარაგვაის, ჩილესა და ბრაზილიას ქვედა დივიზიონიდან კოლუმბიის მორაგბეთა ნაკრები დაემატა, ხოლო სამხრეთ ამერიკის სარაგბო ლიდერები არგენტინა და ურუგვაი ტურნირში არა ეროვნული ნაკრებებით ჩაერთვებიან, არამედ შესაბამისად არგენტინა XV-ით და ურუგვაი XV-ით.

შედეგად, ოფიციალური საერთაშორისო ტესტების სტატუსი ექნება ტურნირის 9 მატჩიდან მხოლოდ 4-ს. 5 მაისს ბრაზილია უმასპინძლებს ჩილეს, 12-ში პარაგვაი - კოლუმბიას, ხოლო 19 მაისს ორი ტესტია: ჩილე - პარაგვაი და ბრაზილია - კოლუმბია. ესაა და ეს.

ფორმატის შესახებაც: ჩემპიონატი ტარდება 3 ტურად, ანუ თითოეული გუნდი თამაშობს 3 მატჩს და ასე არასრულყოფილი ცხრილით ვლინდება გამარჯვებული, ანუ რეგიონის ჩემპიონი. ცალკეულ მატჩში გამარჯვებულ გუნდს ბონუსი ენიჭება მეტოქეზე 3-ით მეტი ლელოს გატანისთვის. აქვე გთავაზობთ სამივე ტურის კალენდარსაც:

I ტური. 5 მაისი

კოლუმბია - ურუგვაი XV

პარაგვაი - არგენტინა XV

ბრაზილია - ჩილე

II ტური. 12 მაისი

ურუგვაი XV - ჩილე

არგენტინა XV - ბრაზილია

პარაგვაი - კოლუმბია

III ტური. 19 მაისი

არგენტინა XV - ურუგვაი XV

ჩილე - პარაგვაი

ბრაზილია - კოლუმბია