შაბათ-კვირას ტოპ 14-ის მეორე წრის პირველი ტურის მატჩები გაიმართება. ხუთი შეხვედრა შაბათს გაიმართება და ამ დაპირისპირებების მონაწილე გუნდების შემადგენლობები ცნობილია.

დღევანდელ მატჩებში მონაწილეობას 7 ქართველი მიიღებს.

17:00 ლა როშელი (2) - აჟენი (12)

მასპინძელთა შემადგენლობაში ოთხთვიანი პაუზის შემდეგ ბრუნდება ლექსო ყაულაშვილი, რომელსაც აღნიშნული დრო კისრის ტრავმის გამო გაუცდა. 25 წლის ქართველი ბურჯი მარქაფაშია.

7 ოქტომბრის შემდეგ "აჟენის" ძირითად შემადგენლობაში პირველად ითამაშებს თამაზ მჭედლიძე, რომელსაც ბოლო პერიოდში მწვრთნელი ნაკლებად ენდობოდა და განაცხადშიც იშვიათად შეყავდა. სტუმართა მარქაფაში არიან ქართველი ბურჯები გიორგი თეთრაშვილი და ვახტანგ ახობაძე.

19:00 სტად ფრანსე (11) - ბორდო (8)

ეს შეხვედრა ქართველები გარეშე ჩაიცვლის. პარიზელთა განაცხადში არ არიან ზურაბ ჟვანია და გიორგი მელიქიძე, ხოლო სტუმართა 23-კაციან შემადგენლობაში ესპუარების, ლაშა ტაბიძისთვის და ირაკლი ცხადაძისთვის ადგილი ვერ გამოინახა.

21:00 ბრივი (13) - მონპელიე (1)

მასპინძელთა მარქაფაში კარლენ ასიეშვილია, ხოლო ვასილ ლობჟანიძე და სოსო ბეკოშვილი ტრავმირებულნი არიან. "მონპელიეს" განაცხადში ქართველი მოთამაშე არ ფიგურირებს. დავით ქუბრიაშვილს ტრავმა აქვს, ხოლო კონსტანტინე მიქაუტაძე და მიხეილ ნარიაშვილი მწვრთნელის გადაწყვეტილებით არ ითამაშებენ.

21:00 ოიონა (12) - რასინგი (4)

შერკინებაში ერთმანეთის პირისპირ ქართველები წარსდგენიან: "ოიონას" მარჯვენა ბურჯი ირაკლი მირცხულავაა, რომელიც ვასილ კაკოვინს შეერკინება.

23:45 ტულუზა (6) - ტულონი (5)

მამუკა გორგოძე დაშავებულია და შესაძლოა, დარჩენილი სეზონის გამოტოვება მოუწიოს. ლევან ჩილაჩავას და ბადრი ახლაზაშვილი სამსახურზე კი ფაბიან გალტიემ თქვა უარი და ეს შეხვედრაც ქართველების გარეშე ჩაივლის.