საფრანგეთის ნაკრების ყოფილი და „ტულუზის“ მოქმედი კაპიტანი ტიერი დიუსოტუარი მიმდინარე სეზონის დასრულების შემდეგ აქტიურ სპორტულ კარიერას დაასრულებს.

კლუბის ხელმძღვანელობას სურდა, რომ 35 წლის ვეტერანი გუნდში დარჩენილიყო და მას ახალი კონტრაქტის გაფორმება შესთავაზა, თუმცა დიუსოტუარმა უარი განაცხადა:

„მოზარდობისას ძალიან მორცხვი ვიყავი. რაგბიმ საკუთარი თავის რწმენა მომცა და საკუთარ თავში ახალი შესაძლებლობები აღმოვაჩინე. ჩემი ცხოვრება სრულად შეiცვალა და ამისათვის რაგბის მადლობელი ვარ.

მქონდა პატივი მემუშავა გამორჩეულ მწვრთნელებთან და მორაგბეებთან. განსაკუთრებული მადლობა გი ნოვესს, რომელთანაც ძალიან დიდი დრო გავატარე. არასდროს დამავიწყდება საფრანგეთის ნაკრებში გატარებული დღეები, განსაკუთრებით ის 56 მატჩი, რომელიც კაპიტნად ვითამაშე. მადლობა რაგბის ყველაფრისთვის!

სეზონის ბოლოს კარიერას დავასრულებ და ამაზე გული არ მწყდება. ვიცი, რომ სპორტს მიღმაც ბევრი საინტერესო რამ ხდება“.

ტიერის საკლუბო დონეზე 300-ზე მეტი თამაში აქვს ჩატარებული. კარიერის სტარტზე ის „ბორდოს“, „კოლომიეს“ და „ბიარიცის“ ღირსებას იცავდა, 2006 წლიდან კი „ტულუზის“ ერთგულია. საფრანგეთის ნაკრების კვართით 80 თამაში ჩაატარა და 6 ლელო დადო. დიუსოტუარი 2007, 2011 და 2015 წლების მსოფლიო თასების მონაწილეა. 2011 წელს ის პლანეტის საუკეთესო მოთამაშედ დაასახელეს.