ჭაბუკთა „ა“ ლიგის მეორე ეტაპის ოთხივე თამაში გუშინ გაიმართა და ყველა მათგანში ერთმა გუნდმა პრემიალური ქულა ჩაიწერა.

ბონუს-ქულა სამმა მოგებულმა და ერთმა წაგებულმა გუნდმა მიიღო, გამარჯვებები კი, ოთხივე შემთხვევაში იმათ დარჩათ, რომლებმაც პირველი ეტაპი პირველ ადგილზე დაასრულეს.

ვარკეთილში „ლელომ“ „არმიას“ უმასპინძლა და 50:3 დაამარცხა. საკუთარ ბაზაზე, დიღომში დაუხვდა „ლოკომოტივი“ „იუნკერები ჩოხოსნებს“ და 41:8 აჯობა, ხოლო ქუთაისურ დერბიში „აია 1“ „ბაგრატზე“ ბევრად ძლიერი აღმოჩნდა - 97:3. მასპინძლებმა მხოლოდ ერთ შეხვედრაში, „ვისოლზე“ ვერ მოიგეს. იქ „ჯიქი“ რუსთავის „ხარებთან“ 10:16 დამარცხდა და პრემიალურ ქულას დასჯერდა.

შეგახსენებთ, რომ გუნდებს მეორე ეტაპზე გადაყვათ იმ თამაშის შედეგები, რომლებიც პირველი ეტაპის ჯგუფურ ეტაპზე პირველ-მეორეადგილოსნებს შორის დაფიქსირდა. მესამე ტურის თამაშები 26-27 აპრილს გაიმართება.

ზურა ქსოვრელი

ნინუცა კაპანაძის ფოტოები